საიტი მუშაობს ტესტირების რეჟიმში

სიახლეები ყველა სიახლე

  • 24 ივლისს, 11:00 სთ-ზე ცესკოში სხდომა გაიმართება

    24 ივლისს, 11:00 სთ-ზე ცესკოში სხდომა გაიმართება

    23 ივლისი, 2016


    პროექტი 

    საქართველოს ცენტრალური საარჩევნო კომისიის
    №48 სხდომის
    დღის წესრიგი

     

     

    სრულად
  • „საარჩევნო განვითარების სკოლების“ პრეზენტაცია

    „საარჩევნო განვითარების სკოლების“ პრეზენტაცია

    22 ივლისი, 2016

    დღეს, ცენტრალური საარჩევნო კომისიის (ცესკო) პროექტის, - „საარჩევნო განვითარების სკოლების“ პრეზენტაცია გაიმართა. შეხვედრა ცესკოს თავმჯდომარე თამარ ჟვანიამ, ევროპის საბჭოს ოფისის ხელმძღვანელმა საქართველოში (CoE) კრისტიან ურსემ და საარჩევნო სისტემების საერთაშორისო ფონდის (IFES) პროექტის ხელმძღვანელის მოადგილე ქეთი მაისურაძემ გახსნეს.  ადგილობრივი და საერთაშორისო არასამთავრობო ორგანიზაციების წარმომადგენლებს პრეზენტაცია ცესკოს თავმჯდომარემ წარუდგინა.

    როგორც შეხვედრაზე თამარ ჟვანიამ აღნიშნა, ცესკო სამოქალაქო ცნობიერების ამაღლების მიზნით არაერთ პროექტს ახორციელებს და მათ შორის „საარჩევნო განვითარების სკოლები“ ერთ-ერთ ყველაზე წარმატებულია.   

    სასწავლო კურსი 18-24 წლის ახალგაზრდებისთვის არის განკუთვნილი და საქართველოს 20 მუნიციპალიტეტში 25 ივლისს დაიწყება. სწავლებაში მონაწილეობის მისაღებად რეგისტრაცია 680-მა ახალგაზრდამ გაიარა.

    სასწავლო კურსის მონაწილეები 10 დღის განმავლობაში შეძლებენ მიიღონ ცოდნა ისეთ მნიშვნელოვან საკითხებზე, როგორებიცაა: საარჩევნო სისტემები, საარჩევნო ადმინისტრაცია, დემოკრატიული საარჩევნო პრინციპები, არჩევითი ორგანოები საქართველოში, არჩევნებში ჩართული მხარეები, არჩევნების გამჭვირვალობა და ხელმისაწვდომობა, გენდერული თანასწორობა და ა.შ. 

    სწავლებას საოლქო საარჩევნო კომისიების წევრები და საარჩევნო ადმინისტრაციის ტრენერები ჩაატარებენ; 46 ტრენერი ცესკოს სწავლების ცენტრმა გადაამზადა.

    „პროექტის მიზნები უკავშირდება სამოქალაქო ჩართულობის გაზრდას და ცნობიერების ამაღლებას. მთავარი და მნიშვნელოვანი არის ის, რომ ახალგაზრდებში მოხდება საარჩევნო საკითხების და არჩევნების პოპულარიზაცია, გაიზრდება არჩევნებში მათი ჩართულობის ხარისხიც და დონეც. რაც მომავალი პროფესიული რესურსის გაზრდისა და ქვეყნის განვითარებისთვის ძალიან მნიშვნელოვანი საქმეა“ - აღნიშნა პრეზენტაციის ბოლოს ჟურნალისტებთან საუბრისას თამარ ჟვანიამ. 

    კრისტიან ურსემ კი მედიასთან საუბრისას საარჩევნო ადმინისტრაციისა და ევროპის საბჭოს მჭიდრო თანამშრომლობაზე გაამახვილა ყურადღება და განაცხადა, რომ ევროპის საბჭო, საარჩევნო მხარდაჭერის პროექტის ფარგლებში ცესკოს ხელს უწყობს მომავალი სამი საარჩევნო ციკლის წარმატებით განხორციელებაში. „უშუალოდ ამ პროექტზე თანამშრომლობით კი  მიზნად ვისახავთ - რაც შეიძლება მეტი ახალგაზრდა ჩაერთოს საარჩევნო პროცესებში,“ - განაცხადა კრისტიან ურსემ.  

    ცესკომ, პროექტი „საარჩევნო განვითარების სკოლა“ 2015 წელს 10 საარჩევნო ოლქში დაიწყო. ახალგაზრდების დიდი ინტერესის გამო, 2015 წელს ერთის მაგივრად სამი კურსი ჩატარდა და მასში მონაწილეობა 627-მა ახალგაზრდამ მიიღო. პროექტის წარმატებით განხორციელების შემდეგ, სკოლების რაოდენობა წელს გაორმაგდა და  სწავლება 20 მუნიციპალიტეტში: გურჯაანში, სიღნაღში, თელავში, რუსთავში, გარდაბანში, მარნეულში, დუშეთში, გორში, ბორჯომში, ახალციხეში, ამბროლაურში, საჩხერეში, ზესტაფონში, ქუთაისში, ოზურგეთში, სენაკში, ზუგდიდში, ფოთში, ბათუმსა და ქობულეთში ჩატარდება.

    ცენტრალური საარჩევნო კომისია გეგმავს, რომ პროექტი გაფართოვდეს და მოიცვას მთელი საქართველო, რაც საარჩევნო ადმინისტრაციის წარმომადგენლებს საშუალებას მისცემს, უფრო მეტ ახალგაზრდას გაუზიარონ საკუთარი პროფესიული გამოცდილება.

    „საარჩევნო განვითარების სკოლა“  ევროპის საბჭოს (CoE) და საარჩევნო სისტემების საერთაშორისო ფონდის (IFES) მხარდაჭერით ხორციელდება.

     

     

    სრულად
  • სამუშაო შეხვედრა ბათუმში

    სამუშაო შეხვედრა ბათუმში

    21 ივლისი, 2016

    ცენტრალური საარჩევნო კომისია (ცესკო) რეგიონებში სამუშაო შეხვედრებს აგრძელებს. დღეს, კომისიის თავმჯდომარე, თამარ ჟვანია და ცესკოს წევრები აჭარისა და გურიის რეგიონის არასამთავრობო ორგანიზაციებისა და პოლიტიკური პარტიების წარმომადგენლებს შეხვდნენ. შეხვედრას ასევე ესწრებოდა აჭარის უმაღლესი საარჩევნო კომისიის თავმჯდომარე პარმენ ჯალაღონია.

    ბათუმის საოლქო საარჩევნო კომისიაში ძირითადი და დამხმარე საოლქო საარჩევნო კომისიების ფუნქციებზე ისაუბრეს. შეხვედრის მონაწილეებს, რომელთა შორის ასევე იყვნენ აჭარისა და გურიის რეგიონის ძირითადი და დამხმარე საოლქო საარჩევნო კომისიების წევრები, აღნიშნულ საკითხთან დაკავშირებით შემუშვებული ინსტრუქციები გააცნეს; განიხილეს ის საკანონმდებლო ცვლილებებიც, რომელიც საარჩევნო კოდექსში ბოლო პერიოდში განხორციელდა.

    „ვისაუბრეთ საკნონმდებლო ცვლილებებზე, ძირითადი და დამხმარე ოლქების ფუნქციებზე, რომლებიც რეალურად მნიშვნელოვანია საზღვრების ახლებურად დანაწილების კონტექსტში. დაისვა ბევრი კითხვა როგორც პარტიების, ისე არასამთავრობო ორგანიზაციების მხრიდან პროცედურებთან დაკავშირებით. მნიშვნელოვანია, რომ აღნიშნული საკითხების აღქმა ყველა ჩართული მხარის მიერ ერთგვაროვანი იყო,“ - განაცხადა თამარ ჟვანიამ შეხვედრის დასრულების შემდეგ ჟურნალისტებთან საუბრისას.

    მსგავსი ტიპის შეხვედრა ცესკომ რამდენიმე დღის წინ ქუთაისშიც გამართა, სადაც აღნიშნული საკითხები იმერეთის, რაჭა-ლეჩხუმისა და სამეგრელოს რეგიონების არასამთავრობო ორგანიზაციებისა და პოლიტიკური პარტიების, აგრეთვე აღნიშნული რეგიონების ძირითადი და დამხმარე საოლქო საარჩევნო კომისიების წევრებთან განიხილეს.

     

    სრულად
  • სამუშაო შეხვედრა ქუთაისში

    სამუშაო შეხვედრა ქუთაისში

    19 ივლისი, 2016

    ცენტრალური საარჩევნო კომისიის თავმჯდომარე თამარ ჟვანია და ცესკოს წევრები იმერეთის, რაჭა-ლეჩხუმისა და სამეგრელოს რეგიონების არასამთავრობო ორგანიზაციებისა და პოლიტიკური პარტიების წარმომადგენლებს შეხვდნენ. ცესკოს  წარმომადგენლებმა შეხვედრის მონაწილეებს ძირითადი და დამხმარე საოლქო საარჩევნო კომისიებისთვის შემუშავებული ინსტრუქციები გააცნეს. შეხვედრაზე ასევე იმსჯელეს იმ საქმიანობებზე, რომელსაც ცესკო 2016 წლის არჩევნებისთვის მზადების პროცესში ახორციელებს. 

    „ბევრი სიახლეა წელს არჩევნებთან დაკავშირებით,  იქედან გამომდინარე, რომ საზღვრების დაყოფა მოხდა ახლებურად, ერთმანდატიანი მაჟორიტარული საარჩევნო ოლქები არის ახლებურად განსაზღვრული, ამ ოლქებთან მიმართებაში ძირითადი და დამხმარე საარჩევნო კომისიები რა ფუნქციას შეასრულებენ, ამაზე კონკრეტული ინსტრუქცია არსებობს. ჩვენ გვინდოდა ყველა ეს ნიუანსი გაგვეზიარებინა პარტიებისა და არასამთავრობო ორგანიზაციების წარმომადგენლებისთვის“-განაცხადა ცესკოს თავმჯდომარემ თამარ ჟვანიამ მედიასთან საუბრისას.

    ზემოაღნიშნული ინსტრუქცია ცესკოს თავმჯდომარემ კომისიის წევრებთან ერთად ასევე გააცნო რეგიონის ძირითადი და დამხმარე საოლქო საარჩევნო კომისიების წევრებს. მონაწილეები დეტალურად გაეცნენ საოლქო საარჩევნო კომისიების უფლება-მოვალეობებს და კანონით დადგენილ მათ მიერ გასატარებელ ღონისძიებებს 2016 წლის 8 ოქტომბრის პარლამენტის არჩევნებისთვის.

    შეხვედრებს ცესკოს იურიდიული, საფინანსო და საარჩევნო პროცესების მართვის დეპარტამენტების ხელმძღვანელებიც ესწრებოდნენ.

    სამუშაო შეხვედრა ქუთაისში საარჩევნო სისტემების საერთაშორისო ფონდთან (IFES) თანამშრომლობით გაიმართა. ცენტრალური საარჩევნო კომისია მსგავსი ტიპის შეხვედრების გამართვას სხვა რეგიონებშიც გეგმავს.

     

     

    სრულად
  • ცენტრალური საარჩევნო კომისიის მიმართვა ამომრჩევლებს

    ცენტრალური საარჩევნო კომისიის მიმართვა ამომრჩევლებს

    16 ივლისი, 2016

    მიმდინარე წლის 13 ივლისს საარჩევნო კოდექსში შესული ცვლილებები 2016 წლის არჩევნებში ამომრჩევლების მონაწილეობის წესს არეგულირებს. ცვლილება ეხება ამომრჩევლებს, რომლებიც საცხოვრებელი ადგილის მიხედვით რეგისტრაციიდან იქნენ მოხსნილები, ასევე ამომრჩევლებს, რომელთა რეგისტრაციაც იუსტიციის სამინისტროს სახელმწიფო სერვისების განვითარების სააგენტოს გადაწყვეტილებით ძალადაკარგულად გამოცხადდა და მათ, ვინც რეგისტრირებულები არიან მისამართის მითითების გარეშე.

    საქართველოს საარჩევნო კოდექსში შესული ცვლილებების თანახმად, ამ ტიპის ამომრჩევლები პარლამენტის არჩევნებში მონაწილეობისთვის 2016 წლის 1 აგვისტომდე უნდა გამოცხადდნენ სახელმწიფო სერვისების განვითარების სააგენტოში და გაიარონ რეგისტრაცია საცხოვრებელი ადგილის მიხედვით ან მიუთითონ მხოლოდ ფაქტობრივი საცხოვრებელი ადგილი.

    დღეს, ცესკოში გამართულ საინფორმაციო ბრიფინგზე, ცესკოს სპიკერმა ანა მიქელაძემ ზემოაღნიშნული კატეგორიის მოქალაქეებს, მოუწოდა დროულად გაიარონ რეგისტრაცია მიმდინარე წლის 31 ივლისის ჩათვლით, რაც მათ არჩევნებში მონაწილეობის საშუალებას მისცემს; „აღსანიშნავია, რომ ისინი ისარგებლებენ გარკვეული შეღავათებით, მათ შორის, კონკრეტული კატეგორიის ამომრჩევლები გათავისუფლებულები იქნებიან მომსახურების გადასახადისგან; აღნიშნულის შესახებ დეტალურ ინფორმაციას მოქალაქეები უშუალოდ სააგენტოში მიიღებენ,“ - განაცხადა ანა მიქელაძემ საინფორმაციო ბრიფინგის ბოლოს.

    სრულად
  • ცესკოს საინფორმაციო/სატელეფონო ცენტრს 28 ოპერატორი შეემატა

    ცესკოს საინფორმაციო/სატელეფონო ცენტრს 28 ოპერატორი შეემატა

    16 ივლისი, 2016

    ცესკოს საინფორმაციო/სატელეფონო ცენტრს 28 ოპერატორი შეემატა, რომელთაგან 8 სტაჟიორია. შერჩეული ოპერატორები საკვალიფიკაციო ეტაპის გავლის შემდეგ მოემსახურებიან მომხმარებელს და არჩევნებთან დაკავშირებულ ნებისმიერ საკითხზე მიაწვდიან დაინტერესებულ პირებს ინფორმაციას.

    ახალ ოპერატორებს ცესკოს თავმჯდომარე თამარ ჟვანია შეხვდა და არჩევნების მნიშვნელობასა და საარჩევნო ადმინისტრაციის როლზე ესაუბრა. საარჩევნო ადმინისტრაციის სტრატეგიული გეგმა კი მათ კოორდინაციის, დაგეგმვისა და ანგარიშგების დეპარტამენტის ხელმძღვანელმა სოფიო სიჭინავამ გააცნო.

    ოპერატორები რამდენიმე მიმართულებით გაივლიან ტრენინგებს: მიიღებენ ინფორმაციას საარჩევნო პროცედურების, საარჩევნო კოდექსში შესული ცვლილებების და საარჩევნო დავების შესახებ. მათ ასევე ჩაუტარდებათ სწავლება ეფექტური კომუნიკაციების და მომსახურების მიმართულებით.

    ცენტრალური საარჩევნო კომისიის ერთ-ერთი პრიორიტეტი ინკლუზიური საარჩევნო გარემოს უზრუნველყოფაა. საინფორმაციო/სატელეფონო ცენტრში დასაქმებული არიან სპეციალური საჭიროების მქონე პირები, ასევე ოპერატორები, რომლებიც ეთნიკური უმცირესობებისთვის გასაგებ - აზერბაიჯანულ და სომხურ ენებზე მიაწვდიან ამომრჩეველს ინფორმაციას.

    სრულად

სიახლე